साउन ११, परासी । पश्चिम नवलपरासीको सुक्रौलीमा ‘फोहोरबाट मोहर’ बन्न थालेको छ । इन्भिपावर इनर्जी एन्ड फर्टिलाइजर प्रालिले फोहोरबाट ग्यास निकालेर बेच्न सुरु गरिसकेको समाचार कान्तिपुर दैनिकमा छ ।
उद्योगका कार्यकारी सञ्चालक अभिरथ अग्रवालका अनुसार पहिलो चरणमा औद्योगिक उपभोक्तालाई उपलब्ध गराइएको छ । ‘रामग्राम नगरपालिकाका बजार क्षेत्रमा तत्काल पाइपलाइनबाट भान्सा–भान्सामा ग्यास पुर्याउने लक्ष्य छ’, उनले भने, ‘यो सस्तो मात्र होइन वातावरणमैत्री पनि छ ।’
सञ्चालक अग्रवालका अनुसार दिनमा १ सय ५० सिलिन्डर ग्यास उत्पादन हुने गरेको छ । साथै यसको मूल्य प्रतिसिलिन्डर ९ सय रुपैयाँ मात्र छ ।
कुहिने वस्तु, कुखुराको सुली, गोबर, चिनी मिलको छोक्रा आदि यसका कच्चा पदार्थ हुन् ।
