जेठ ४, दमक । झापाको बेलडाँगी भुटानी शरणार्थी शिविरका वृद्धवृद्धाको विजोग भएको छ । अधिकांश परिवारका सदस्य पुनर्वास कार्यक्रमअन्तर्गत पश्चिमा मुलुक गएकाले हेरचाह गर्ने मान्छे नभएपछि उनीहरूको अवस्था दयनीय बनेको हो ।
शिविर–२ सेक्टर ‘फोर’ हट नम्बर ४८ का ८४ वर्षीय श्रीनारायण प्रधानको बिहीबार निधन भयो । बिहान पौने ९ बजे निधन भएका उनको शव दिउँसो ३ बजेतिर मात्र अन्त्येष्टि गरियो ।
४ छोराछोरीका अभिभावक प्रधानको शव घाटसम्म लैजान आफन्त कोही भएनन् । स्थानीयले ठेलामा राखेर नजिकैको हम्सेदुम्से सामुदायिक वनमा पुर्याई अन्त्येष्टि गरिदिए ।
६ महिनाअघि विष्णुकुमार घलेको अन्त्येष्टि पनि छिमेकीले नै गरेका थिए । दुई छोराछोरीका बुवा घलेको शव अटोरिक्सामा घाट पुर्याइएको थियो । उनको निधन हुँदा छोरी अस्ट्रेलियामा तथा छोरा सवारी दुर्घटनामा गम्भीर घाइते भई बिर्तामोडस्थित अस्पतालमा उपचाररत थिए ।
शरणार्थीमध्ये घर–परिवारसँग सम्बन्धविच्छेद भएका वृद्धवृद्धा, शारीरिक रूपमा अशक्त र एकल महिलाहरू मर्नु न बाँच्नुको दोसाँधमा छन् । निधन भएकाहरूको शव उठाउन आफन्तसम्म साथ छैनन् । शिविरमै रहेका वृद्ध बुवाआमा बिरामले थलिएका खबर कान्तिपुरमा छ ।
