जेठ १६, पाँचथर । ताप्लेजुङ फक्ताङलुङ गाउँपालिका–२ का ४३ वर्षीय भक्तबहादुर सबेन्हाङको भाइको शव लिएर घर जाँदै गर्दा पाँचथरको हिलिहाङ–७ भारपाको टारीमा बा १७ च ८४५१ नम्बरको पिकअपबाट खसेर ज्यान गएको छ ।
मंगलबार मेची राजमार्गअन्तर्गत पाँचथरको हिलिहाङ–७, टारीमा पुग्दा पिकअपबाट खसेर घाइते भएका उनको उपचारका लागि पाँचथर अस्पतालमा ल्याउँदै गर्दा बाटोमै ज्यान गएको हो ।
उकालो बाटोमा पिकअपको पछाडि भागमा भाइको शवसँगै बसेका उनको गाडीको गियर परिवर्तन गर्दा खसेको प्रहरीले जनाएको छ ।
दुई वर्षअघि काम गर्न मलेसिया पुगेका भाइ देवीप्रसादको मलेसियामा गाडी दुर्घटनामै एक हप्ताअघि ज्यान गएको थियो ।
घटनापछि गाडी र चालकलाई जोरपोखरी प्रहरी चौकीले नियन्त्रणमा लिएको छ । घटनाबारे अनुसन्धान भइरहेको जिल्ला प्रहरी कार्यालय पाँचथरका प्रहरी नायब निरीक्षक वामदेव गौतमले बताएको खबर गोरखापत्रमा छ ।
